Este domingo soprarei as 19 (pra aforrar pulmón vou poñer só os números 1 e 9), cravadas sobre capa de chocolate e galleta. Pero desta vez decateime de que faltaba un detalle. Unha postal de felicitación, sí, co remite da TVG, como acontecía cada ano. Pero aínda así lembrei que nun pasado fun xabarín, e é ben posible que un chisquiño aínda me quede.

Este post vai dedicado ás xeracións que medramos con estes debuxos, qué digo, programa, qué digo, fenómeno cultural: Saíu en antena o 18 de abril de 1994, e en poucos anos xa serían 100.000 rapaces (a cuarta parte dos nenos de Galicia) os que enviasen dúas fotos carnet coa resposta á enrevesada pregunta de acceso. Saír da escola cada tarde, e mandarse o bocata da merenda namentres viamos O doutor Slump (Arale), o interminable (e polémicamente voilento) Dragon Ball Z, Cazapantasmas, Hatori o Ninja, Os Picapedra, Astérix e Obélix, Rocky e Bullwnikle, (espera que collo aire).....Garfield, Gatocan (soiño no mundo está), Manda Truco, Sin Chan, As tartarugas mutantes e MOITOS MÁIS. Se vos pica algunha vez o meniño que levades dentro podedes mirar e descargar moitas destas series en Xeración Xabarín. Os debuxos non o eran todo, tamén había concursos onde berrabas Oink! e levabas un walkman, tamén publicaban as fotos dos rapaces que cumprían anos, pero é pecado esquecer os videoclips de "A cantar con Xabarín". Son tan coñecidos coma as series, así que omitirei enumeralos (Churras, Ai ven Pistón, Non todo é o que parece, A lavadora, vale, xa paro). Ata aquí por hoxe socios, e mañá, máis e mellor.